ليه - لامؤخذة - بنبوس؟!!

ليه بنبوس ؟ انا اقصد البوس أياه مش الى على الخد يعني
الموضوع يبدو بديهي شويتين أو أبيح

بس عايزكوا تتخيلوا الموضوع مجرد..هو أينعم البوس حلو . بس يعني أول راجل وست حطّوا شفايفهم على بعض... الموضوع إلى حد ما مقرف (وهو مجرد طبعاً)

ليه بقى بنبوس؟

في نظرية بتقول أن موضوع البوس ده أساسا بدأ عند عدد من الثديات بسبب أن امهاتهم بتأكلهم وهما صغيرين عن طريق التقبيل .. حتى الإنسان قبل ما يعملوا السريلاك والحركات دي كانت الأم بتبمضغ الأكل وبتديه لأبنها في بقّه.
ونقدر نشوفه لحد النهاردة في الطيور والقرود مثلاً.
وواحده من السنن النبوية عند ولاد المولود اسمها التحنيك (مضغ التمر في فم شخص معافى ووضعه على لسان الوليد).
الحوار ده ليه فوايد .. لما بيحصل نقل الأكل من الام للطفل بيتنقل نشويات، بروتين، حديد وزينك .. وبيسهل على الطفل امتصاص فيتامينات زي ب 12 (أجمد من نيدو).

بعيداً عن موضوع الإطعام بالتقبيل..
ففي "خشم" كل واحد فينا حاجة زي ما تقول شبابيك للهرمونات .. زي التستوستيرون (هرمون الذكورة) مثلاً .. فلما الولية بتبوس جوزها تحس أنه الراجل ده زي الفل لما تلاقي التستوستيرون ملعلع منغير ادراك ... عشان كدا في بلاد بره وشوية من بلاد جوّا بيبوسوا قبل الجواز وبيقولوا أن البوس مؤشر على جودة العلاقة، وأن 60 % من الرجالة و 66% من الستات فكسوا لعلاقات كانت البوسة الأولانة فيها مش قد كدا ..... ما علينا.

في مشاهدات تانية بتثبت أن الإنسان عمل الحركة دي لما شاف حيوانات تانية بتبوس بعضها في عملية التكاثر أو غير التكاثر.
لأن التقبيل بيزود افراز الدوبامين والأوكسيتوسين .. الأولاني بيبسط ويشهيص والتاني بيزود الحميمة والرغبة الجنسية.

المهم أن البوس على الشفايف أول القرن الى فات ده كان بيحصل زي البوس على الخدود دلوقتي (شوفوا مثلاً فيديوهات وداع الجنود لأهلهم في الحربين العالميتين).